కొత్త వర్ణాల కోసం ...

వంశీ కలుగోట్ల// కొత్త వర్ణాల కోసం ...//
*************************************

ఓ మా'నవుడి' బొమ్మ గీద్దామని
వర్ణాల కోసం అన్వేషణ మొదలు పెట్టాను

కొనసాగుతున్న యుద్ధం లోంచి
పుట్టుకొచ్చిన రక్తపు వాసనల ఎరుపు రంగు

పుడమి పరచిన అడవి తివాచీలోని
చెట్ల ఊపిరి తీసి పిండుకొచ్చిన పచ్చరంగు

జరుగుతున్నమారణహోమంలో
కాలుతున్న బ్రతుకుల మంటలలోని పసుపు రంగు

ఏ రంగుతో బొమ్మ గీద్దామన్నా అవి
ఏదో ఒక మంటలో కాలుతూ మసి పులుముకున్నాయి

మూలాలకు దూరం జరిగి
సంకుచితాలతో సంకరమై
పుట్టుకొచ్చిన కొత్త వర్ణాలు
వద్దనుకున్నాక చూస్తె
ఇక ఏ రంగూ మిగలలేదు

మా'నవుడి' బొమ్మ గీయడానికి
సరికొత్త వర్ణాల కోసం
నా అన్వేషణ ...
కొనసాగుతూనే ఉంది