వంశీ కలుగోట్ల - కవితలు

వంశీ కలుగోట్ల // ... గాయాలు // ****************************** * కొన్ని గాయాలు గుర్తులుగా మిగిలిపోతుంటాయి  నడక నేర్చుకునేటప్పుడో అడుగులు తడబడినప్పుడో నడవడిక సరిగా లేకనో గాయాలు అవుతుంటాయి అవి గుర్తులుగా మిగిలిపోతాయి *            *            * కొన్ని గాయాలు వెంటాడుతూనే ఉంటాయి  కాలం మరచిపోతుందేమో కానీ, హృదయం మరచిపోలేని గాయాలు కొన్నుంటాయి ప్రేమ ఓడిపోయో బంధం విడిపోయో స్నేహం మాటున ద్రోహమో హృదయానికి తగిలే గాయాలు వెంటాడుతూనే ఉంటాయి ఎప్పటికీ *            *            * కొన్ని గాయాలు గేయాలవుతుంటాయి  ఒక్కొక్కడు ఒక్కో రకం పక్కోడికి దెబ్బ తగిలినా పువ్వు నలిపేయబడినా ప్రపంచం బాధని తమ బాధలా భావించే భావుకులుంటారు బాధను అనుభవిస్తూ గేయాలు స్రవిస్తుంటారు *            *            * కొన్ని గాయాలు విప్లవాలవుతుంటాయి  బంధించి కొడితే పిల్లి పులి అవుతుందో లేదో అణచివేయాలని చూస్తే కడుపు మండినోడు మాత్రం తిరుగుబాటు చేస్తాడు వాడి గాయం విప్లవాన్ని సృష్టిస్తుంది