ద్వి ...

వంశీ కలుగోట్ల // ద్వి ... //
*************************

మొదటి అడుగు పడినప్పుడు

వాళ్ళందరూ

'ఏం చేశాడురా?' అన్నారు

ప్రయాణం పూర్తయ్యాక

వాళ్ళందరూ

'ఏంచేశాడురా!' అన్నారు
*              *              *

వెలుతురు భరించలేక

వాళ్ళందరూ

చలువ కళ్లద్దాలు పెట్టుకున్నారు

రాత్రయ్యాక చీకటయ్యిందని

వాళ్ళందరూ

దీపాలు వెలిగించి కూచున్నారు
*              *              *

బతుకు కోసం ఊరొదిలితే

వాళ్ళందరూ

'పిరికోడు' అన్నారు

ఉద్యోగం కోసం దేశం వదిలితే

వాళ్ళందరూ

'గొప్పోడు' అన్నారు
*              *              *

పలకరింపుగా నమస్కరిస్తే

వాళ్ళందరూ

నన్ను పట్టించుకోలేదు

ఎన్నికలప్పుడు నమస్కరిస్తే

వాళ్ళందరూ

నన్ను నాయకుడని అన్నారు