... వాదానిదే విజయం

వంశీ కలుగోట్ల// ... వాదానిదే విజయం //
*************************************

ఆలయపు గోడమీదో

మసీదు అరుగు మీదో

చర్చి మెట్ల మీదో కూచుని

వాడంటాడు

కులాలు లేవు, మతాలు లేవు

మనుషులంతా ఒక్కటే

పురాతన వాదాలన్నీ ప్రతిబంధకాలే అని

వాడికింకా తెలిసినట్టు లేదు

తన వెనకున్న కులం

తనకి అధికారాన్ని ఇవ్వగలదని

అధికారంలో ఉన్నప్పుడు

తప్పులన్నీ కప్పిపుచ్చగలదని

వాడికింకా తెలిసినట్టు లేదు

నా వెనకున్న కులం

నన్ను ఎదగనివ్వదని

నా దరిద్రం కూడా
ప్రభుత్వపు సహాయ పథకాలు
అందుకోవటానికి పనికిరాదని

వాడికింకా తెలిసినట్టు లేదు

వాదాల ముసుగున సాగిన అణచివేతను

శతాబ్దాల చరిత్ర సాక్షిగా

అనుభవించిన సమాజం

తిరగబడిన సమయంలో

త్రాసుమొగ్గులో తేడా వచ్చిందే కానీ

విజయం వాదాలదే అని

వాడికింకా తెలిసినట్టు లేదు

పురాతన వాదాలన్నిటికీ పాతరేసి

విజయం సాధించడమంటే

మేమిద్దరమూ ఒకే వైపు ఉండటమని

చరిత్ర మారుస్తామని చెబుతూ

చెరోవైపున నిలుచున్న మా ఇద్దరి లాంటోళ్ళను చూసి

పురాతన వాదాలన్నీ

విజయగర్వంతో నవ్వుకున్నాయి ...