పిడికెడు ధూళి ...

వంశీ కలుగోట్ల// పిడికెడు ధూళి ...//
**********************************

ఎవరో ఒక మేధావి 

మూలాలు వెతికి చూసినపుడు

నేను హిందువునైతేనేమి

లేక ముస్లిమునైతేనేమి

క్రైస్తవుడినో కాకపొతే మరే వర్గపు వాడినో

నేనెవరైనా సరే సమాజం లెక్కలో

గాలిబ్ చెప్పినట్టు

'ఎవరికీ పనికిరాని పిడికెడు ధూళిని' మాత్రమే

ఎప్పుడో యుగాలనాటి, శతాబ్దాల క్రితపు 

చరిత్రను తవ్వుకోవడమెందుకులే

మొన్న మొన్నటి గతాన్ని తలచుకున్నా

ఒక్కటిగా ఉన్న దేశం ముక్కలుగా విడిపోయినప్పుడు

ఆక్రమణలు, అరాచకాలు
దాడులు జరిగినప్పుడు

సబర్మతి రైలు బోగీ తగలబెట్టబడినప్పుడు

దానికి ప్రతిగా హింసాకాండ జరిగినప్పుడు

ముంబై పేలుళ్లు, గోకుల్ ఛాట్ ప్రకంపనలు

పార్లమెంట్ ముట్టడి, తాజ్ హోటల్ పై దాడి

ఒకటా రెండా - ఎన్నని ప్రస్తావించేది 

కాశ్మీరం నుండి కన్యాకుమారి దాకా

దాష్టీకానికి బలైనదెవరైనా

ఉగ్రదాడిలో ఊపిరి వదిలినదెవరైనా

హింసాకాండలో అసువులు బాసినదెవరైనా

పోయినదెవరో తెలీకపోయినా

రాజకీయం రంగప్రవేశం చేసి

ఏదో ఒక మతం/వర్గం రంగు పులిమి

సామాన్యులను బలి చేస్తోంటే

మనమేం చేయ్యగలిగామని

నా మూలాలు వెతికి నన్నూ ఏదో ఒక వర్గానికి

అంటగట్టటం తప్ప సాధింపబడింది ఏముంది

నేనొక సామాన్యుడిగా

నువ్వొక మహా మేధావిగా గుర్తింపబడటం తప్ప 

ప్రతి సందర్భంలోనూ

నవరంధ్రాలలో నైరాశ్యం నింపుకుని

నా బతుకుబండిని లాగిస్తున్నాను

నువ్వొక మేధావివి కాబట్టి

'ఉగ్ర'మూలాలు వెతికే దమ్మూ లేదు

దాష్టీకాన్ని అడ్డుకునే శక్తీ లేదు

నా సామాన్యత్వపు మూలాలు వెతికటం తప్ప

నువ్వు ఊడబొడిచిందేమీ లేదు 

అందుకే గాలిబ్ చెప్పినట్టు

'ఎవరికీ పనికిరాని పిడికెడు ధూళి'

కాకపొతే మరింకేమవుతాం మనం