గోడలు ...

వంశీ కలుగోట్ల// గోడలు ... //
******************************

మిత్రమా

నీవు దళితుడివో, శూద్రుడివో

రెడ్డివో, రాజువో లేక మరింకెవరివో

నీ రంగు, గోత్రం ఏదైతేనేం

నువ్వు మానవత్వపు తానులో

ఒక ముక్కవేనన్న నమ్మకం నాది 

అవును, నాది అగ్ర వర్ణమే

రక్తపు రుచిమరిగిన ఈగ, దోమల జాతివాడెవడో

బహుశా నా రక్తం రుచి చూసి తీర్మానించాడు కాబోలు

లేక పుట్టుక ముందే నా బుద్ధెరిగిన మహా విద్వాంసుడెవడో

సర్టిఫికెట్టు ఇచ్చి ధృవీకరించాడేమో తెలియదు

నా వర్ణం, రక్తం అగ్రమని

మిత్రమా

నీ రక్తం, వర్ణం నిర్ధారించినవాడే

నా రక్తం, వర్ణం నిర్ధారించాడు

వాడికా హక్కెవడిచ్చాడో తెలియదు

కానీ, నేనూ మనిషినే 

నాలో ద్వేషం లేదు

పగ, కుత్సితం లేవు

అసహ్యం, అసహనం లేవు

ఉన్నదంతా ప్రేమే

నీకూ, నాకూ మధ్య ఉన్న గోడ

ఒక్క ఆలింగనంతో బద్దలవుతుందంటే రా

ప్రయత్నించి చూద్దాం 

నీ జాతి అయినా

నా జాతి అయినా

తగవు తీరుస్తానని పుట్టుకొచ్చిన నాయకులను నమ్మకు

వాడికి మన మధ్య సయోధ్య నచ్చదు

మన రెండు జాతుల శవాల దిబ్బల మీద

భవనాలు కట్టుకోవాలనుకునే
నికృష్టపు జాతి వెధవలు వాళ్ళంతా

వాడికి మనమధ్య స్నేహం నచ్చదు

నువ్వూ-నేనూ అన్న భావననుండి బయటపడి

వర్ణాల గోడలు బద్దలు కొట్టుకుని

'మనం'గా మారడం వాడికి(వాళ్లకి) ఇష్టం లేదు

ఎందుకంటే

అది వాడి ఆస్థిత్వానికే ముప్పు కాబట్టి
వాడి తంత్రానికి లోబడతావో 
 నీ బుద్ధికి పదునెడతావో నీ ఇష్టం