దిక్పాలకులు ...

వంశీ కలుగోట్ల// దిక్పాలకులు ... //
**********************************

తూరుపు దిక్కున - ఉన్నారు కొందరు అక్కడ

ప్రపంచం బాధని తమ బాధలా ఫీలయ్యే శ్రీ శ్రీ లాంటివారు

అక్షరాలు, ఆయుధాలు ఊతంగా తీసుకుని

తిమిరంపై సమరం చేసి

ప్రపంచానికి వెలుగును పంచాలనుకునే సూరీడు లాంటోల్లు 

పశ్చిమ దిక్కున - అక్కడ కొందరు ఉన్నారు

ఆశలను అవసరాల మేరకు అణచేసుకుని

ఉద్యోగాలు చేసుకుంటూ, వోట్లు వేసుకుంటూ

ఎవడొస్తే వాడిని నెత్తిన పెట్టుకుని ఊరేగుతూ

బతుక్కూ చావుకూ మధ్య దూరాన్ని

ప్రజాస్వామ్యపు స్వేచ్ఛతో కొలుస్తూ

చీకటివైపు లోకాన్ని తీసుకెళుతూ

ఉత్తరం దిక్కున - అక్కడ కొందరు ఉన్నారు

జీవితాన్ని, జీవించడాన్ని అనుభవిస్తూ

ఆనందాలని డబ్బుతో కొలుచుకుంటూ

ఉన్న సంపదని ఇంతలు ఇంతలుగా పెంచుకుంటూ

ప్రపంచాన్ని కిందకు తోసి తాము పైపైకి ఎదిగిపోతూ
 

దక్షిణ దిక్కున - అక్కడా కొందరు ఉన్నారు  

ప్రపంచానికీ తమకూ సంబంధమేంటో అర్థం కాని పరిస్థితుల్లో

తమను తామే హత్యించుకుంటూ
చరిత్రలో చెత్తని నింపుతూ

మార్చటానికి ఎవడో ఒకడొస్తాడని ఎదురుచూస్తూ