... దృష్టి

వంశీ కలుగోట్ల // ... దృష్టి //
***************************
దేశాలన్నీ తిరిగొచ్చాక

నేనన్నాను ప్రపంచం చిన్నది అని

ఇంటిబయట అరుగు మీద కూచుని

ఆకాశం చూసి వాడన్నాడు

అవును, ప్రపంచం చాలా చిన్నది అని
*                  *                  *

ఊరొదిలి పోయి, కష్టాలు పడి

ఒక ఉద్యోగం సంపాదించాక నేనున్నాను

బతకాలంటే పోరాడాలి అని

ఉన్న ఊర్లో వ్యవసాయం చేస్తూ

సాయంకాలం ఇంటికొచ్చాక వాడన్నాడు

అవును, బతకాలంటే కష్టపడాల్సిందే అని
*                  *                  *

సౌండ్ ప్రూఫ్ రూంలో కూచుని

ఇంస్ట్రుమెంటల్ మ్యూజిక్ వింటూ నేనన్నాను

సంగీతం ఒక అద్భుతం అని

గాలికి ఊగుతున్న పైరు సవ్వడి

చెట్లమీద పక్షుల కూతలు వింటూ వాడన్నాడు

అవును, సంగీతం అద్భుతం అని