గొర్రెలమంద ...

వంశీ కలుగోట్ల// గొర్రెలమంద ... //
******************************

కుందేటి కొమ్ము సాధించాలని

కుక్కను కుర్చీమీద కూచోబెట్టాలని

గుర్రానికి రెక్కలు మొలిపించాలని

నిజాన్ని నిజమని మేధావులచేత ఒప్పించాలని

ఎందుకురా అలవికాని కోరికలతో

కాడి భుజాన వేసుకొని బయల్దేరతావు 

ఒరేయ్  
మాన్యుడననుకునే సామాన్యుడా 
ఏమి జరిగినా అన్నీ మూసుక్కూచోక 
గొంతెత్తాలానే యత్నమెందుకురా 
ఏబ్రాసి యెదవన్నర యెదవా 
నీ పనేదో నీవు చూసుకోక ... యాడికి బోతావురా

నువ్ యాడ తిరిగినా

ఎన్నికల యాలకి నిన్ను నీ మందను
పోలింగ్ బూత్ కాడికి తోలుకోస్తాననే
నమ్మకం ఉన్నోడే నాయకుడు

నీ బతుకు నీది అనుకుంటున్నావేమో

వాడు పెట్టే గడ్డికి ఆశపడి

ఎప్పుడో మందలో కలిసి వాడి ఆస్థివైపోయావు

కులమో, మతమో, ప్రాంతమో - దడి ఏదైతేనేం

నువ్వు దాటిపోకుండా ఆపి ఉంచటానికి

అయినా

నువ్వు ఎదురు చూడాల్సింది

ఇంకా ఎంత గడ్డి పెడతాడు అని కాదు

వీడే కోసుకుతింటాడా లేకపోతే

కసాయివాడికి అమ్ముతాడా అని

అంతకు మించి నువ్వేమీ చెయ్యలేవు